An tiez-skol

Ur rouedad enni 48 skol, 6 skolaj ha daou lise diazezet war Breizh he 5 departamant eo Diwan. 4307 skoliad.ez eo a oa skoliataet enno e distro-skol 2019, an div drederenn anezho er c’hentañ derez hag an drederenn all en eil derez.

Ar skolajoù

E 1998 e voe digoret Skolaj Diwan Penn-ar-Bed en ur ranndi e Brest. Bloaz war-lerc’h e voe kaset d’ar Releg-Kerhuon.

E 1995 e voe digoret Skolaj Diwan Bro-Dreger (an hini netemañ en Aodoù-an-Arvor) e Plijidi (Trger) e savadurioù feurment digant Studi ha Dudi (kreizenn sevenadurel).

E 1997 e voe digoret Skolaj Diwan Jakez Riou Kemper.

E 1999 e voe digoret Skolaj Diwan Bro-Gwened, an hini nemetañ e Bro Gwened. E-kerzh bloavezh-skol 2019-2020 e voe lidet 20vet deiz-ha-bloaz ar skolaj-mañ. Ennañ e oa neuze 135 skolajiad.ez, hag int dasparzhet e 7 klasad, 100 diabarzhiad.ez en o zouez.

N’eus skolaj ebet e Breizh a vije ken tost ouzh ar mor ha Skolaj Diwan Gwiseni, bet digoret e 2003 evel astenn eus hini ar Releg. Ken tost ken ez a ar mor tost betek sal-debriñ ar skolaj.

Lise Karaez

E 1994 e voe digoret ar c’hlas eilvet kentañ er Releg-Kerhuon. E 1997 e voe staliet al lise e Karaez, ma’z eo kresket tamm-ha-tamm betek degemere 400 lisead.ez.

Lise Gwened

Gant digoradur lise Diwan Gwened e distro-skol 2020-2021 e voe kreñvaet rouedad eil derez Diwan. Hag evit kalz skolidi.adezed e vo aesaet ar c’hendalc’h studiañ betek ar vachelouriezh tost ouzh du-se.