Buhez ar c'hlas

Roll ar penngelenner -ez

Dezhañ eo da reoliañ buhez ar c’hlasad war an dachenn bedagogel :

  • Kelaouiñ a ra al liseidi war kement tra a sell ouzh mont en dro al lise.
  • Selaou a ra ar c’hlasad a-stroll pe a hiniennoù.
  • Kuzuliañ a ra pep lisead war e labour ha war an hentañ.
  • Ober a ra al liamm etre ar renerezh hag al liseidi.
  • Merañ a ra an darempredoù gant ar gerent.

An hentañ

Ur bloavezh-hentañ eo an eilvet klas:

NB : E-pad an eurvezhioù heuliañ-hentañ e vez skoazellet al lisead evit e breder war an hentañ

> Trimiziad kentañ.

E-pad ar c’huzul-klas e vez priziet al labour, ar barregezhioù hag an emrenerezh.

> Eil trimiziad.

Pep familh a urzhio dibaboù evit an hentañ : dibab un hent micherel, eilañ, tremen en ur C’hentañ klas en ur resisaat an arbennikadurioù (teknologel pe hollek). Kuzuliet e vez al lisead gant ar penngelenner/ez. Diouzh al live labour ha barregezhioù e vez roet un ali kentañ gant ar c’huzul.

> Trede trimiziad.

Ur c’huzulhentañ eo ar c’huzul-klas diwezhañ. Reiñ a ra un ali war goulennoù urzhiet ar familhoù. Pa’z a a-du ar familh gant an ali e teu da vezañ un diviz. Pa ne ‘z a ket a-du e rank kaout un emgav gant ar rener. Hemañ a c’hell pe gadarnaat ar c’hinnig kentañ pe dont en-dro warnañ. Pa n’eus emglev ebet e rank ar familh ober galv. An trede trimiziad a rank kas da gadarnaat ar barregezhioù tizhet, ar spered labour, an emrenerezh.

Petra ober ma sav ur gudenn war ar c’helenn?

  1. Al lisead-ez gant diasterioù a rank mont e darempred gant ar c’helenner-ez.
  2. Pa sav ur gudenn a-stroll ez a ar gannaded-klas e darempred gant ar penngelenner-ez. N’emañ ket er c’huzul klas e vez diskoulmet seurt aferioù.
  3. A-benn kaout kuzulioù, kaout respontoù da c’houlennoù a sell ouzh ar c’helenn e vez aliet ar gerent da vont e darempred gant ar penngelenner-ez pe gant ar renerezh.
  4. Pa n’eus bet kavet diskoulm ebet d’ur gudenn e live ar c’hlasad e teu ar rener da vezañ e karg da zivizout.